مفضلاتي في شهر ابريل April favorites

السلام عليكم
اليوم راح اتكلم عن مفضلاتي في شهر ابريل ، اتمنى تستفيدون من البوست .

اول مفضلة هي كفر الايفون هذا 
طبعا انا احب القطط فمرة اعجبني و استخدمته فتره طويلة لانه يحمي الايفون 
الكفر شريته اونلاين من هذا الموقع 
http://shop.nordstrom.com

ثاني مفضله هي معطر الغرفة هذا 
ريحته مره فريش و جميله بس ما ينفع تبخين كثير لانه يكتم
 هذا من كولكشن قديم لاني شريته من فتره طويله فانا مو متاكدة اذا تقدرون تلقونه اللحين

تنت للشفايف من لش ريحته لاتيه و لونه وردي مايل للبني 
اهم شي قبل ما تحطينه تقشرين شفايفك لانه يبينها مره ناشفة بس بشكل عام مره حبيت لونه 

هذا مثل السلك تحطين فيه الميموري حق الكاميرا و تشبكينه على الايباد عشان تنزلين الصور 

طريقة سريعة للي ما عندهم صبر ينزلون الصور على الابتوب و بعدين على الايباد مثلي =) 

اهم شي لازم تعرفونه انه بس يستخدم للايباد و ما تقدرون تستخدمونه مع الايفون 

The Book Thief
هذا اجمل كتاب قريته =)
يتكلم عن طفلة عمرها ٨ سنوات تسرق الكتب 
طبعا و صفي مرة ما راح تفهمون منه شي فافضل لكم تقرون بالنت عنه 
و اهم شي ان الراوي في القصة هو الموت فهذا شي غريب و غير مستهلك 
طريقة الكاتب الشاعرية في وصف الاحداث جدا جميله و تجذب القارء 
بالنهاية الكتاب جدا جميل و اعتبره من اجمل الكتب اللي قريتها 


و بكذا انتهى البوست ، اتمنى عجبكم .

.STAY BEAUTIFUL

NEW YEAR 2014 HOW TO BE HAPPY

السلام عليكم ♥

و دخلت السنه الجديدة و كلنا نخطط لبداية اجمل و كلنا نبي نعرف كيف تكونين سعيدة و تكون حياتك اجمل و افضل من اللي قبلها 

اول شي يتحكم بسعادتك هو ثقتك بنفسك و انك تحبين نفسك و تتقبلينها زي ما هي 

صدقيني مهما حاولتي انك تكونين واثقة بنفسك و انتي ثقتك عدم مستحيل توصلين للسعادة التامة 

اهم شي تتصالحين مع نفسك تتقبلين كل الاشياء اللي ماتحبينها بنفسك و تركزين على الاشياء الجميلة فيك و لا تفكرين ان ما فيه اي شي جميل فيك لان مستحيل يكون فيه اي احد فيه هذا الكون ما فيه اي شي يميزة عن غيرة و حتى الاشياء اللي تشوفينها سلبيات فيك فيه غيرك يشوفها مميزات و لا تقارنين نفسك باي احد غيرك لانك انتي مميزة بالشكل اللي خلقك فيه ربك و مستحيل يكون اي احد بيرفيكت ما فيه اي سلبيات .

تخيلي ان فيه بنتين و حدة جميلة لكن دايم سلبية و تتشكى من نفسها و ما تحب نفسها و تعطيها حقها و بنت عادية لكن واثقة بنفسها و تنشر الايجابية وين ما تكون طبعا راح تجذبك ثقة الثانيه اكثر لان ما فيه احد يبي يكون مع احد سلبي و مو واثق من نفسه فانتي فكري بهذي الطريقة ، ابدا لا تقللين من قيمتك عند احد او تقارنين نفسك باحد لان انتي مو اقل من احد و لا احد اقل منك كلنا متساوين عند الله .

المفتاح الثاني للسعادة هو التفكير الايجابي  ،اكذب عليك لو اقول ان حياتي خاليه من الاشياء اللي تخليني افكر بسلبيه لكن قد ما اقدر احاول اني ما اخلي هذي الاشياء تتحكم في حياتي .

احد قالك شي ضايقك لا تسمحين له يخرب المود حقك و فكري انه ما يستحق تضيعين وقتك عليه ،

 انتي اللي تتحكمين بسعادتك .

لا تخلين اكبر همك شخص يبي يقهرك لان اولا هذا الشخص ما عنده شغله غير انه يتدخل في حياة الناس و ثانيا اكيد هذا الشخص غيران منك و يتمنى انه يكون مثلك . 

الايجابيه هو مهما ما يكون ما تعطين الاشياء اكبر من حجمها و تكونين سعيدة بنفسك و سعيدة بحياتك و تفكرين انك كل شي يحصل لسبب .

ربي ما خلقك عشان تضيعين حياتك انك تحاولين تكونين احد غيرك .

و علاقتك مع ربك كيف ؟
مستحيل تكونين سعيدة و انتي تاخرين صلواتك و تهجرين القرآن
هذي السنة خلي واحد من اهدافك انك قد ما تقدرين ما تاخرين صلاتك و تقرين نص صفحة من القرآن كل يوم عشان ما تكونين من اللي يهجرون القرآن و تقرين وردك اليومي عشان ربي يحفظك من كل شر ان شاء الله .
فكري ايش الاشياء اللي كنتي تبين تسوينها هذي السنة و ما سويتيها او تطمحين انك تكونين افضل فيها ؟
القراءة لازم تكون لها مساحة من اهدافك هذي السنة لانها جدا مفيدة لعقلك و تطور نفسك و طريقة تفكيرك .
هذي السنة واحد من اهدافي اني اقرأ اكبر عدد ممكن من الكتب و ان شاء الله اتوفق في هذا الشي =)
السنة هذي بالنسبة لي راح تكون سنة تغيير بإذن الله .
و خلصنا البوست لهذا اليوم =)
عام سعيد لكم جميعا و الله يعدي هذي السنة على خير 

FALL\WINTER MUST HAVES (FASHION,BEAUTY,AND RANDOM)

السلام عليكم 

بدا موسم البرد ففكرت اسوي بوست عن الاشياء الاساسية اللي احتاجها بهذي الفترة =) 

بسم الله نبدأ =)

UGG SLIPPERS \ BOOTS 

ماركة  UGG جدا مريحة و شكلها جميل شريتها من نوردستروم و ممكن تلقونها عند تاجرات 

BEANIES 

 ال BEANIES في هذ الوقت مرة تدفي و جميلة و تقدرين تلقين اشكال كثيرة و تنسقينها مع ملابسك و تخلي الشكل مرة جميل  اللي على اليمين من نيولوك و اليسار من GARAGE 

FALL \ WINTER SCENTED HANDSOPES,BODY WASH,HAND SANITIZERS 

من اليمين مجموعة بودي واش و كريم و مقشر من مجموعة من نوردستروم و معقم و صابون لليدين من باث اند بودي 

عموما باث اند بودي عندهم مجموعات جدا جميلة 

SCARFS

السكارفات في هذي الفترة جدا دارجة و تعطي لوك حلو للبس 

اللي فوق شاريتها من فترة ما اعرف من وين بالضبط و اللي تحت من gagrage 

COZY PJS AND FUZZY SOCKS 

فترة الشتاء طبعا راح يتغير الجو و راح تحتاجين ملابس تدفي اكثر مثل البجامة في هذي الصورة قماشها مو مثل قماش البجامات العادية و مرة تدفي و طبعا راح تحتاجين ال fuzzy socks 

الشرابات من H&M و البجامة من اويشو 

DARK LIP COLORS 

الالوان الغامقة اجمل وقت لها في الشتاء مو مثل الصوف تكون الالوان الفواتح اكثر 

بالنسبة للروج اللي اخترته مو غامق مرة بس بالنسبة لي لونه مناسب لاني ما استخدم الالوان الغامقة كثير 

سواتش للون :

الروج من مجموعة زبدة السفايف من ريفلون و هذا احسن لان في الشتاء الشفايف تتشقق و تنشف اسرح فهذا يعطي لون و شوي ترطيب بنفس الوقت 

درجة اللون و اسمه: 075 LOLIPOP

DARK NAILPOLISHES 

مثل ما قلت قبل شوي الالوان الغامقة تبرز اكثر في فترة الخريف و الشتاء 

هذي مجموعه من نيكس الوانها غامقة و جميلة و توفير للفلوس بدلا من انك تشترين كل واحد لحالة لان هذي فيها مناكير تكون ميني و بالنسبة لي افضل لاني صراحة ما اخلص الفل سايز بسرعة و احب اغير بالالوان كثير فهذا افضل شي ممكن اسويه 

المجموعة من نوردستروم و سعرها ٨٠ ريال 

HAND CREAM,CHAP STICK,BODY BUTTER 

في هذي الفترة بشرتي تكون مثل الحراشف من كثر ما هي جافة هههههههه 

فلازم 24 ساعة ترطيب و استخدم زبدة الشيا الافريقية صراحة ريحتها مو مرة زينة بس ما تثبت و كريم 21 و مرطب للشفايف من eos و لا تنسين ان اهم شي يرطب الجسم من الداخل هو الموية و بصراحة انا ما اداوم على شرب المويه يعني تمر ساعات ما اعطش و لا اشرب اي شي و هذا جدا مضر =( بس هذي الفترة إن شاء الله اداوم عليها 

و خلص البوست لليوم إن شاء الله نال اعجابكم 

+ احنا داخلين في فترة اختبارات فراح اضطر اني اغيب عن المدونة لفترة ف ادعولي اني اتوفق =) 

STAY BEAUTIFUL AND HAVE FUN  =)

DIY How to make your own shirt

السلام عليكم 

بوست سريع صورته قبل فتره و إن شاء الله يفيدكم 

في هذا البوست راح اذكر طريقه انك تطبعين اي صورة تبينها و تسوين تيشيرت فيه الصورة بدون ما تحتاجين اشياء كثيرة 

تحتاجين الى  :

• تيشيرت ابيض او ملون على حسب نوعية الورق انا ورقي مخصص للابيض 
• transfer paper موجود في جرير نوع للابيض و نوع للملون  سعره ٥٩
• مقص 
• كواية 

اول شي تحتاجين انك تطبعين الصور على الورق 

قصي الورق و خلي مسافه بالابيض عشان لما تشيلينها من التيشيرت ما تخرب 

اللحين حطي الورق على التيشيرت بالمقلوب و اكويه خفيف و اتركيه ٥ دقايق يبرد لان الورق راح يكون حار 

و شيليه

!TA DAA

و هذا شكل التيشيرتات النهائي بعد ما تشيلون الورق 

اتمنى عجبكم هذا البوست اعرف انه جدا قصير بس حبيت اسوي شي سريع 

!STAY BEAUTIFUL AND HAVE FUN 

HAUL! urban outfitters,victoria's secret,vera bradley

السلام عليكم♥

اول شي راح اقوله اعرف اني سحبت على البلوق سحبة اليمه جدا =)
بس جدا انشغلت و بديت بالدراسة و توني مخلصة الفاينالز بعد =) و اوعدكم ما راح اتاخر عن البلوق مثل كذا و راح انزل بوست كل اسبوعين كبداية و بعدين راح ابدأ انزل كل اسبوع بوست إن شاء الله♥
اليوم راح اسوي البوست اللي من زمان كنت راح اسويه بس ما لقيت وقت وهو مشترياتي من النت و راح اقولكم من اللحين ان التصوير مو مرة زين ف اسفه =)

اول شي نبدأ ب urban outfitters

هذي التوب جدا كيوت و اول ما شفتها كان لازم اطلبها مريحه و جدا شكلها جميل
المقاس اخذت اكبر من مقاسي بشوي عشان يكون شكلها جميل باللبس

وهذا توب صراحة ما توقعته كذا و الباترن كنت طالبة باترن ثاني و اتوقع انه تغير بالغلط و وصلني هذا =(

سويتر جدا كيوت و يشبه التوب الاول لانه من نفس الماركة  تعمدت اخذ مقاس اكبر عشان يكون شكله جميل مع ليقنز او سكيني جينز

وهذا الشي ما ادري ايش اسميه ههههه كنت احسب انه جاكيت عادي بس القماش طلع جدا خفيف و ما تنفع للجو البارد
بس شكلها مرة كيوت و انا احب الباترنز اللي تكون فلورال =) و المقاس  شوي كبير افضل شي اتوقع خوذي اصغر من مقاسك بشوي

هذي البرايه على شكل اليونيكورن مرررره كيوووت و كان لازم اخذها =)

و هذا قلم حبرمرة عجبني  شكله مرة يضحك و غريب

دفتر جميل للافكار اتوقع اني راح استخدمة للمدونة

(circle skirt) جدا جميله و مثل ما قلت انا احب الفلورال باترنز

(swear pant ) غريب و مو معتاد لانه من قدام جلد و من الخلف قماش عادي فمرة عجبني

فرش للرسم على الاظافر استخدمتها مرتين و ما عرفت  بس لازم فترة و اتعلم عليها ( بعض الفرش فيها الوان من المناكير فلا تدققون هههه )

توب مفتوح من الجنب فتحة كبيرة و من قدام مكتوب (sup) شكلها جميل و عجبتني

(الصورة من الموقع لان ما عرفت اصور الشوز ههه)
شوز من كونفيرس حبيب الكل ههههه اللي يعرفني زين يعرف اني اعشق هذي الماركة فكان لازم اخذ منها هذي المرة لان ما عندنا مثلها

( الصورة من الموقع )
شوز جميل مرتفع شوي و من قدام فيه هذي القطعة الذهبية اللي خلت شكلة مميز و جميل ما عرفت اصورة لان كل مرة احاول يطلع انعكاسي ههه

بالنهاية الموقع جدا جميل و انصحكم تاخذون لفة عليه



اللحين نروح ل Victoria's secret pink
اللي يعرفني بعد يدري اني مدمنة هذا المحل اغلب الجاكيتات  حقتي منه و مرة احبه و طبعا اذا كنتي بتطلبين من pink  خلي ببالك ان المقاسات جدا كبيرة فاذا مقاسك ميديم خوذي سمول او اكس سمول

توب مفتوح من الجنب و مربوط بالنهاية مره شكله كيوت لونه وردي فاتح ممكن بالتصوير مبين غير

توب لونه مينت مكنوب عليه pink

يوجا بانتس واحد قصير الى تحت الركبة و الثاني الى نهاية الساق مرة مريحين و اشكالهم جميلة

و طبعا لازم اشتري جاكيت هههه مكتوب عليه pink بعد 

و شريت معه (sweat pant ) مكتوب عليه love pink 

جاكيت ثاني عليه سباركلز من عند القبعة و مكتوب عليه pink

محفظة للميك اب او للاقلام بس انا راح استخدمها للاقلام مع الباق اللي راح اوريكم 

باق مرة جميله جلست اكثر من شهرين عشان توصل لانه ضاعت و ارسلوا بديلة لها بس مررة جميله و انا احب الاشياء اللي فيها الجالاكسي 

(planner ) لتنظيم الاشياء اللي لازم اسويها 

و اخر شي شريته هو المفرش اللي صورت عليه لونه منت و شريت معه بطانيه الباترن حقها ليبورد برنت مرره كيوت 

اللحين نروح ل Vera bradley ميزة هذا الموقع انه يوصل للسعوديه و جدا سريع ما شاء الله 

اول شي هذي الكروس بودي باق مرة مريحة و كبيرة و اخذت معها wristlet فيها مكان للجوال بدال المحفظة لان ممكن تنفع للايام الخفيفة و اللي ما ابي اشيل الباق فيها و فيه مكان للبطاقات و الفلوس 

( اسم الباترن بالموقع happy snails )

و اخر شي هذي الباق استخدمتها لمدة اكثر من شهر و جدا مريحة و تشيل عفشك كله و معها محفظة للاقلام او فرش الميك اب بس انا استخدمتها للاقلام و جدا جميله 

( اسم الباترن بالموقع english rose )

و بكذا خلصت البوست اتمنى اعجبكم و اعذروني على التصوير بس إن شاء الله المرات الجاية اكون افضل اكتبولي بالكومينتس رايكم و اقتراحات لبوستات ممكن اسويها♥

استودعكم الله♥

soap and glory review =)

السلام عليكم♥

هذا اول بوست لي =) فاخترت شي الناس هابين فيه الفترة هذي هو سوب اند قلوري ♥

طبعا معظم الناس عارفين انه كان ممنوع بالسعودية بعدين سمحوه و الناس ماقصروا 

الارفف كلها فاضية هههه الناس كانوا يطلبونها من تاجرات او من الموقع نفسه بس 

اللحين متوفر بصيدليه بوتس 

هذي الفروع اللي اعرفها (بالرياض ) :

حياة مول ( الدور الثاني )

غرناطة (الدور الأرضي )

نبدأ بمنتجات الشاور ♥

منتجات الشاور ماعندي منها الا ٣ لكثرة اغراض الشاور اللي عندي لكن لما اخلصها ممكن ارجع اشتري =)

نبدأ من اليمين :

the scrub of your life 

مقشر لون الجل شفاف و حبيبات التقشير وردية صراحه ما اعرف ايش اكتب يعني
هو يعطيك يقشر شوي و يعطيك نعومه بس مو واو يعني ( يارب فهمتوا علي ههههه)
بس ريحته مرة حلوة بس ما تثبت كثير الخلاصة ريحته حلوة بس تقشيره عادي
ف إذا تبغين تدلعين نفسك شوي هذا مناسب =)


sugar crush

و هذا بعد مدري ايش اقول هههه انا ما احس بالفرق كثير بالمقشرات لان بشرتي
جافه شوي مدري إذا فيه علاقة هههه الا بمقشرين راح اتكلم عنهم قريبا ان شاء الله
المقشر لونه بيج و الحبيبات سوداء  ريحته مثل الكيوي و الليمون تقشيره ما اعرف صراحه
بس ممكن افضل من the scrub of your life لكن الثاني ريحته افضل =)

clean girls body wash

هذا بودي واش ريحته روعة بس ما اعرف ليه احيانا احسها تشبه ريحة العطور الرجاليه
 بس ثباتها خفيف و زي ما انتوا شايفين مانقص من العلبة الا قليل مع اني استخدمه من
 فترة طويلة لان العلبة كبيرة المهم انصحكم فيه اذا تبغون شي ثباته مو قوي

نبدأ من اليمين :

heel genius

هذا كريم لتشققات القدم ريحته ما اعرف كيف اوصفها لكن حلوة
من مكوناته الليمون و البرتقال تحطينه على القدم و تلبسين الشراب
قبل النوم او اي وقت صراحة انا ما استخدمت المنتج لفترة طويله
عشان احكم عليه لانه مايعطي نتايج بسرعة ف لقيت منتج ثاني
يعطي النتايج في ليلة وحدة او على حسب التشققات اللي عندك
راح اتكلم عنه بعدين ان شاء الله .


hand food 

كريم لليد سالفته طويله هههه
ف البدايه كنت اشوف ان الناس يتكلمون عنه و يقولون ان الريحه
مو مرة بس لما شميته برى السعودية اعجبتني الريحة و استغربت
كيف الناس ما يحبون ريحته و شريت علبتين زي ما انتوا شايفين من
الحماس ههههه لكن تركته لفترة و رجعت شميته حسيت الريحه تغيرت
وشميت كل العلبتين كلهم نفس الريحة و للحين كذا ما اعرف ليش
بس الكريم حلو ترطيبة بس انتبهوا تحطونه عند الشمس يسمر اليد



the righteous butter 

لوشن للجسم ريحته حلوة مثل ريحه منتجات سوب اند قلوري الثانيه ترطيبة
حلو لكن صراحه ما استخدمته كثير لاني موسوسه ما ابي يخليني اسمر
لانه عطري  مع استخدام المنتجات اللي فيها عطور كثير راح تخليك تسمرين
مع الوقت لكن المنتج حلو ترطيبه =)



glow getter

سبراي للجسم و الوجه للتان المنتج توزيعه صعب و ممل صراحة و يروح مع المويه
و الصابون و ما يسمر كثير لازم تعيدين عليه اكثر من مرة وهذا الشي يقهر هههه
اما بالنسبة للوجه ما استخدمته صراحة لان يضر بالوجه و لازم تلبسين شي على
يدينك عشان يطبع على الكفين ف المنتج اقل من عادي و بالنسبه لي ما يستاهل
ممكن تجربه لان اول مرة استخدم منتجات للتان ف ما حسيته اعجبني كثير



وخلصنا اتمنى البوست عجبكم و ياريت تقولون رايكم في التعليقات و تقترحون علي اشياء ممكن
اسويها =)

♥..bye

first post =)

بسم الله الرحمن الرحيم 

اخيرا تم الافتتاح may 9, 2013

مساحتي الصغيرة انزل فيها بوستات 

all about fun &beauty

(=hoping to reach my dreams 1 day

3>...bye